தேவையானவை: நன்கு பழுத்த மாம்பழம் – 1, புளி – எலுமிச்சை அளவு, சின்ன வெங்காயம் – அரை கப், பச்சை மிளகாய் – 12 (அல்லது) மிளகாய்தூள் – 3 டீஸ்பூன், தக்காளி – 4, மஞ்சள்தூள் – அரை டீஸ்பூன், உப்பு – தேவையான அளவு, கறிவேப்பிலை – சிறிது. தாளிக்க: கடுகு – அரை டீஸ்பூன், வெந்தயம் – அரை டீஸ்பூன், கறிவேப்பிலை – சிறிதளவு, எண்ணெய் – கால் கப். வறுத்துப் பொடிக்க: வெந்தயம் – அரை டீஸ்பூன், சீரகம் – அரை டீஸ்பூன், பச்சரிசி – ஒரு டீஸ்பூன், கடலைப்பருப்பு – ஒரு டீஸ்பூன்.
செய்முறை: வெங்காயத்தைத் தோலுரித்து இரண்டாக நறுக்குங்கள். மாம்பழத்தை தோலுடன் சற்று பெரிய துண்டுகளாக நறுக்குங்கள். பச்சை மிளகாய் போடுவதானால் சற்று பெரிய துண்டுகளாக்குங்கள். புளியை இரண்டரை கப் தண்ணீரில் கரைத்து வடிகட்டி அதில் உப்பு, மஞ்சள்தூள், தக்காளி சேர்த்து கரையுங்கள்.
எண்ணெயைக் காயவைத்து கடுகு, வெந்தயம், கறிவேப்பிலை தாளித்து வெங்காயம், மிளகாய் சேர்த்துக் கிளறுங்கள். இது நன்கு வதங்கியதும் புளிக்கரைசலை சேர்த்து மாம்பழத் துண்டுகளை சேருங்கள். நன்கு கொதித்து சேர்ந்தாற்போல ஆனதும் பொடித்த பொடியை தூவிக் கிளறி இறக்குங்கள்.
மாம்பழத்தின் மணமும் சுவையும் குழம்பில் சேர்ந்து, அலாதியான ருசியைக் கொடுக்கும்.
